Ramatloka Warta Sunda
Literasi Digital, Budaya dan Kewargaan

Zidane Haré-haré Diolo MU

Zinédine Yazid Zidane, hamo bireuk deui. Nya jago maén bal, nya tapis ogé ngalatih. Zidane, si jangkar di tengah lapang.

Basa final Piala Dunia 2006, Zidane narajang bék Italia, Marco Materazzi. Disuruduk dadana nepi ka tijengkang. Zidane dikartu beureum. Geunjleung sajagat. Perancis éléh adu pinalti. Italia juara. Ti harita Zidane pangsiun.

Najan kitu, ti wangkid 4 Januari 2016, Zidane kapeto pikeun ngalatih Real Madrid, ngaganti Rafaél Bénitéz. Langsung nanjung, Real Madrid jadi Juara Liga Champions, 29 Mei 2016.

Sapanjang tilu usum di Bernabeu, Zidane geus ngagémbol tropi La Liga, Supercopa dé Éspana, katut tilu gelar Champions League. Lain bantrak-bantrakeun.

Ngan nya kitu téa, antukna mah Zidane ngoléséd ti Los Blanclos, diganti ku Julen Lopetegui. Kiwari keur ngaligeuh. Pakanci.

Aya iber salalar, kiwari Zidane keur diincer ku Manchester United. Lantaran nasib Joe Morinho aya dina congo tanduk. Kabéhdieunakeun dianggap gagal ngalatih MU.

Tapi Zidane haré-haré. Sakumaha nu ditepikeun ku agén Zidane, Alain Migliaccio. “Zidane deuk istirahat, peré heula ngalatih. Ceuk kuring mah Zidane moal ngalatih di Inggris. Kuring geus nyarita jeung jinisna. Cenah gaya maén bal di Inggris teu cocog jeung Zidane,” pokna.

Mairan