Ramatloka Warta Sunda
Literasi Digital, Budaya dan Kewargaan

Urang Bandung Ditingker, Bohong!

Haringga Sirla (23) baloboran getih. Nyawa paragat, digebugan bobotoh Persib. Viking jeung Jakmania harénghéng. Sumebar béja, cenah mobil pelat D nu ngulampreng ka Jakarta di-sweeping. Urang Bandung ditingker.

Dina Twitter aya poto jalma ngagimbung. Diwawaas keur ngepung mobil. Dikait-kaitkeun jeung kajadian nu tumiba ka salah saurang Jakmania — Haringga — nu perlaya téa.

Sihoréng henteu kitu. Dicutat ku BolaSport.com tina akun Twitter Jak Tanjung Barat. “Isu sweeping téh hoax,” pokna. Warga Bandung atawa Jawa Barat tong hariwang.

Euweuh masalah. Sakumaha béja nu sumebar. Anu dina poto éta mah keur mapag para pamaén Persija, lain sweeping. Lamun aya mobil pelat D nu lécét, laporkeun ka pulisi, prosés sacara hukum,” ceuk éta akun nandeskeun.

Dumasar kana catetan Save Our Soccer, sajeroning genep taun (2012-2018) geus aya tujuhan nu nemahan pati. Opat urang Bobotoh (Persib), tilu urang Jakmania (Persija).

1. Rangga Cipta Nugraha (Bobotoh), 29 taun, palastra tanggal 27/5/2012.
2. Lazuardi (Bobotoh), umurna 17 taun. Kajadianana tanggal 27/5/2012.
3. Dani Maulana (Bobotoh), 17 taun, tilar dunya alatan dikoroyok tanggal 27/5/2012.
4. Gilang (Jakmania), umurna 24 taun. Apes, labuh tina mobil, balik lalajo laga Persija vs Persib di Solo (6/11/2016).
5. Harun Al Rasyid (Jakmania), umur 30 taun. Tilar dunya basa balik lalajo Persija vs Persib di Solo (6/11/2016), dikoroyok di Tol Palimanan, Cirebon
6. Ricko Andrean (Bobotoh), dikoroyok basa Persib vs Persija di Stadion Gelora Bandung Lautan Api (22/7/2017).
7. Haringga Sirla (Jakmania), umur 23 taun. Digebugan saméméh duél Persib vs Persija di Stadion Gelora Bandung Lautan Api (23/9/2018).

sumber: viva.co.id