Ramatloka Warta Sunda
Literasi Digital, Budaya dan Kewargaan

Tilu Pakakas Anyar ti Google

Geus 20 taun geuning kumulendangna Google di alam maya téh. Jasana tangtu wé lain lumayan. Da sasat jadi pituduh jalan keur réa jalma nu inggis atawa geus sasab. Enya, apan nepi ka sok aya kacapangan, “Tanyakeun wé ka Mbah Google”.

Atuh gawéna mingkin rancagé deuih, Goggle téh. Éta wé, dina poé Salasa (9/10/2018), di New York Amérika, Goggle ngagelarkeun tilu pakakas anyar. Nyaéta smartphone Pixel 3, Google Hub, jeung tablet Google Slate. Kabéh gé Google nu nyieun, cenah.

“Dinten ieu kami seja ngawanohkeun kulawarga anyar nu tiasa disebat entragan katilu ti Google. Pokona mah dijamin lah smartphone Pixel 3 jeung Pixel 3 XL pakakas pangpinterna sareng nu ngagunakeunna baris diogo pisan,” cék Sénior Vice President Hardware Google, Rick Osterloh.

Ngan hargana lain bantrak-bantrakeun cacah. Lian ti kudu mesen langsung ka Amérika, paling copél kudu ngodok pésak welasan juta waé mah. Komo jaman harga dolar keur mahal kaya kieu mah.

Smartphone Google Pixel 3 nu layarna 5,5 inci hargana 799 dolar. Kira Rp 12,1 just. Mun nu Pixel 3 XL kalayan layar 6,3 inci mah 899 dolar. Leuwih mahal, da leuwih badag jeung leuwih samakta. Kira Rp 13,6 juta.

Saméméh asup ka urang, éta barang rék ngajajal pasar Australia, Kanada, Prancis, Jerman, Jepang, India, Irlandia, Italia, Singapura, Spanyol, Taiwan, Inggris, jeung tangtu Amerika Serikat heula.

Mairan