Ramatloka Warta Sunda
Literasi Digital, Budaya dan Kewargaan

Tilu Layon Sakulawarga Beleger

MÉRÉBÉJA – Éar salembur. Tilu layon sakulawarga beleger kénéh. Kapireng iberna basa dikali rék dipindahkeun. Alatan lahanna deuk dipaké jang paimahan.

Perenahna di Désa Handaphérang, Kacamatan Cijeungjing, Kabupatén Ciamis, Salasa (18/9/2018). Salila ieu éta lahan dipaké makam kulawarga.

“Hookeun waé nu aya,” ceuk Adang Suhérlan, basa nyeueung layon nu jadi bapa, aki, jeung alona sabeuleugeunjeur kénéh. Boéhna ogé teu kua-kieu. Teu kaambeu aya bau.

Adang nétélakeun, lahan makam geus dibébaskeun pibakaleun komplék perumahan. Ku kituna makam kulawarga kudu dipindahkeun.

Bapana Adang — Jalaludin — geus dikurebkeun 35 taun. Nu dua deui, Sasmita dikurebkeun 14 taun ka tukang. Layon Kaimita Nurkamila mah dikurebkeun taun 2013, lima taun kaliwat.

Garwa Jalaludin, Emoh (70) nembrakkeun, almarhum téh pikayungyuneun pisan. “Solat lima waktu tara kalangkung. Nyaah ka sim kuring,” pokna.