Ramatloka Warta Sunda
Literasi Digital, Budaya dan Kewargaan

Sidang Paripurna lstiméwa DPRD Kabupatén Tasikmalaya

SINGAPARNA, MÉRÉBÉJA—Taun ieu Kabupaten Tasikmalaya nincak dina umurna nu ka-387. Geus ditetepkeun dina Peraturan Daérah (Perda) Nomor 1 tahun 2015, yén poé gumelarna Kabupatén Tasikmalaya kudu direuah-reuah unggal tanggal 26 Juli, tiap taun.

Éta téh ngindung kana bukti sajarah nalika Ngabéhi Wirawangsa dijenengkeun Mantri Agung Bupati Soekapura. Sakumaha nu kaunggel dina Piagam Sultan Mataram tanggal 9 Muharam Tahun JIM ahir/tanggal 26 Juli 1632.

Taun ieu gé pamaréntah teu luput ngareuah-reuah poé gumelarna Kabupatén Tasikmalaya. Di antarana Déwan Perwakilan Rakyat Daérah (DPRD) Kabupatén Tasikmalaya ngagelar “Sidang Paripurna Istimewa”. Sidang lumangsung poé Jumat (26/07/2019), di Ruang Rapat Paripurna.

Harita sajarah Kabupatén Tasikmalaya dideres deui. Nu ngaderesna Drs. Asép Darisman, Kabag Humas dan Keprotokolan. Terus baé dina pamungkasna dipintonkeun rupaning kasenian Sunda.

Nu milu sidang lain baé pimpinan jeung anggota DPRD Kabupatén Tasikmalaya. Réa gegedén nu milu. Antarana baé Bupati Tasikmalaya, H. Adé Sugianto, S.Ip; Wakil Gubernur Jawa Barat, H. Uu Ruzhanul Ulum, S.E.; wawakil ti anggota DPRD Provinsi Jawa Barat; Forum Koordinasi Pimpinan Daérah (Forkopimda) Kabupatén Tasikmalaya; Bupati Tasikmalaya ka-20, Drs. H. Tatang Farhanul Hakim, M.Pd; Kepala Satuan Kerja Perangkat Daerah (SKPD) di Lingkungan Pamaréntah Kabupatén Tasikmalaya; jeung réa deui nu diondang.

Dina éta kasempetan, H. Ruhimat minangka Pupuhu DPRD Kabupatén Tasikmalaya unggah mimbar. Nu intina negeskeun yén pihakna minangka législatif mosisikeun diri minangka mitra gawé keur éksékutif. Ngan pédah moal leungiteun daya kritis ka nu jadi éksékutif.

“Kami teu weléh concern kanggé masihan usulan demi ngaronjatkeun ajén pamaréntahan. Ieu dinten, dinten gumelarna Kabupatén Tasikmalaya, tangtos janten hiji kasempetan kanggé ngalenyepan deui lalampahan urang, naon nu tos dipigawé ku urang enggoning ngaraharjakeun masyarakat Kabupaten Tasikmalaya, boh nu tos kalangkung boh kanggé ka payunna,” ceuk Ruhimat dina biantarana.

Dina poé nu sarua, Ruhimat gé masrahkeun panghargaan pertanian ka Kepala Dinas Pertanian (Kadistan), Roni Sahroni.