Ramatloka Warta Sunda
Literasi Digital, Budaya dan Kewargaan

Sabada Nyekék McGregor, Presiden Rusia Nelepon

Khabib Nurmagomedov Ménta Hampura

Superstar Ultimate Fighting Championship (UFC), Conor McGrégor bobor karahayuan. Teu walakaya dicekék Khabib Nurmagomedov. Padahal saméméhna hahaok, tur ngahina Khabib bébéakan.

Munasabah lamun Khabib ogé kasigeung. Malah sabada McGrégor éléh wowotan, Khabib ngajlengan Oktagon. Ribut jeung tim McGrégor. Meupeus keuyang, alatan saméméh tanding dihina waé.

“Manéhna ngungkit-ngungkit agama kuring, nagara kuring, bapa kuring. Ieu mah olahraga nu gedé ajénna. Lain olahraga ngadu sungut. Kuring hayang ngarobah nu kitu. Tong ngomong soal agama jeung nagara nu taya pupurieunana,” ceuk Khabib.

Aya nu manghanjakalkeun ku tingkah Khabib kitu téh. Tapi teu saeutik ogé nu ngabéla. Malah langsung ditelepon ku Presiden Rusia, Vladimir Putin.

“Presiden Putin nelepon. Reueus ka kuring tur ngawilujengkeun,” pokna bari ménta hampura teu bisa nahan ambek, alatan McGrégor ngahina mamawa agama jeung bapana. “Hampura Las Vegas. Hampura Névada,” Khabib nandeskeun, poé Senén (8/10/2018) saperti nu dicutat ku viva.co.id.

Mairan