Ramatloka Warta Sunda
Literasi Digital, Budaya dan Kewargaan

Rapat Paripurna DPRD dina Miéling Poé Merdika

SINGAPARNA, MÉRÉBÉJA—Indonésia geus 74 taun merdika. Unggal Agustus urang Indonésia saruka bungah. Miéling poé merdika ku rupa-rupa kamonésan. Diaya-aya. Diréka-réka.

Anggota Déwan Perwakilan Rakyat Daérah (DPRD) Kabupatén Tasikmalaya ngagelar Rapat Paripurna di kantorna. Poé Jumaah (16/8/2019). Agéndana ngabandungan pidato kanagaraan Présidén Républik Indonésia. Ir. H. Joko Widodo ditongton tina layar kaca.

Réa nu hadir. Pimpinan DPRD katut anggotana haladir. Dilengkepan ku Bupati Tasikmalaya, H. Adé Sugianto, S.Ip; para Kepala Satuan Kerja Perangkat Daerah (SKPD); Forum Koordinasi Pimpinan Daerah (FORKOPIMDA); jeung Dinas Komukikasi dan Informasi (Diskominfo).

Dina éta kasempetan, Présidén Indoneésia nandeskeun, yén kalintang penting mun sakumna lembaga di jero pamaréntahan sauyunan. Paheuyeuk-heuyeuk leungeun paantay-antay panangan. Mun nagara hayang weweg, mangka pangeusina ulah paburencay.

“Égo lembaga tos kedah dirobohkeun. Urang geus waktuna ngawangun karya ayar babarengan. Rasa aing jeung sikep paaing-aing geus teu usum deui, geus kudu ditinggalkeun. Nu kudu dironjatkeun mah sikep sauyunan sabilulungan,” kitu diantarana eusi biantara Présidén Indonésia téh.

Atuh di sagédéngeun éta, anggota DPRD gé ngeusian rapat paripurna pikeun réfléksi. Ngalenyepan rupaning hikmah tina kamerdikaan. Sangkan teu méncog ketak, kalah hianat kana perjoangan para pahlawan.

“Ayeuna, tugas bangsa nu utama mah numuwuhkeun sumanget joang 1945 ku rupaning préstasi dina sagala widang. Nu tujuanna enggoning ngawujudkeun jiwa pangwangunan anu kuat,” ceuk Érry Purwanto. Érry téh Wakil Ketua DPRD Kabupatén Tasikmalaya. Jeneng déwan ti Partéy Golongan Karya (Golkar).

Pikeun ngawujudkeun sumanget joang téh, numutkeun Érry mah, di antara dina poéan miéling kamerdikaan Indonésia urang kudu bisa ngaragap angen sorangan, bari tumanya; naon nu jadi kakuatan jeung naon nu jadi kahéngkér urang salila jadi pangeusi bangsa nu merdika téh.

“Tangtos urang kedah usaha kanggo ngaronjatkeun kamajuan bangsa nagara. Naon nu tos dipasihkeun ku urang kanggé kamajuan Kabupatén Tasikmalaya? Naon deuih nu tiasa dilakonan enggoning neraskeun perjoangan dina ngawangun bangsa ka payunna?” ceuk Érry deui.