Ramatloka Warta Sunda
Literasi Digital, Budaya dan Kewargaan

PGRI Ngadongsok

Guru Honorér Langsung Diangkat

MÉRÉBÉJA – Persatuan Guru Republik Indonesia (PGRI) ngadongsok, sangkan para guru honorér langsung diangkat jadi PNS. Teu kudu ngilu tés.

“Guru honorér nu geus sakitu lilana ngajar, sangkan diangkat. Laju disertifikasi ku Program Pelatihan Guru (PPG). Mun meunang kitu, tapi teu jadi sarat,” ceuk Ketua PB PGRI, Unifah Rosyidi.

Usul Unifah dirojong ku para guru honorér katut pangurus PGRI provinsi nepi ka ranting. Lajuning lakuna PGRI puseur ngagelar rapat pléno di Jakarta. Madungdengkeun prosés rékruitmen CPNS kiwari nu dianggap teu adil.

Hasilna ngirim surat ka Menpan ditembuskeun ka Presiden, Mensesneg, Mendikbud, BKN, Menkeu, DPR RI, DPD RI jeung pihak nu tumali. Eusina meredih sangkan aspirasi ti handap jadi bahan tinimbangan.

“Rekruitmen CPNS ditunda heula. Tong waka dituluykeun, saméméh masalah guru honorér bérés,” ceuk Unifah. Boh K1 nu can diangkat, boh K2 nu ngaranna geus aya dina database.

“Utamana nu umurna leuwih ti 35 taun, geus babakti di kelas. Alatan sajeroning 10 taun euweuh rekruitmen guru,” pokna.

Demi kaadilan, sagancangna ngaluarkeun PP ngeunaan PPPK pikeun guru. Honorér nu umurna 35 taun ka luhur nu kadata, boh K1 boh K2 bisa diurus ku Pemda, sangkan aturanana disederhanakeun. Kontrak ngan ukur sakali. Meunang jaminan kaséhatan jeung pagawé. Boga kasempetan ngilu sertifikasi guru, tur diaku pikeun Tunjangan Profési Guru (TPG).

Ka hareupna, pamaréntah jeung DPR RI sangkan ngarévisi UU ASN. Méré lolongkrang nu sarua ka honorér pikeun ngilu CPNS. Copélna nu geus babakti sakitu lilana bisa ngilu rékruitmen CPNS nepi ka umur 45 taun.

“PGRI nangtung panghareupna, ngawal perjoangan honorér. Tuluy ihtiar sangkan aya solusina. Ku kituna aksi solidaritas di daérah sing tartib, simpatik, tong ngaganggu prosés diajar di sakola,” ceuk Unifah nandeskeun.