Ramatloka Warta Sunda
Literasi Digital, Budaya dan Kewargaan

Pasanggiri Pop Sunda Mintembeyan Ngareuah-reuah Milangkala ka-13 Dangiang Sunda Pakidulan

CULAMÉGA, (MéréBéja),- Béda ti sasari nyoréang mangsa ka tukang, milangkala Dangiang Sunda Pakidulan nu katiluwelas gumelar di lapang hareupeun SDN 3 Cintabodas, Kac. Culaméga.

Eusina kawilang euyeub ku rupa-rupa kamonésan seni jeung budaya urang Sunda, kayaning, calung buhun, calung modéren, rampak kendang jeung kohkol, kaulinan barudak (gobag, péclé, teteguhan), penca silat, pasanggiri ngaliwet, domba kasép.

Nu kawilang geus maneuh nyaéta pasangiri pop Sunda nu mindeng digelar unggal taun dina mitembeyan bubuka milangkala. Poé Saptu (28/10/2019), aya 25 patandang ngahaleuang dina panggung.

Lagu pilihanana di antarana aya Mawar Bodas, Lelembur Kakasih, Hampura, Balaka, Aisan Indung, jeung réa-réa deui. Saréngséna pasanggiri aya tilu pinilih patandang tina 25 pamilon. Pinunjul kahiji nyaeta Shéli Indriani, pinunjul kadua Opik, nu katilu Naila.

Pupuhu DSP, Ending Supratman SH nétélakeun Milangka ka-13 DSP nu di Cintabodas kawilang munggaran diayakeun. Tangtuna ieu hiji tarékah sangkan DSP bisa dipikawanoh ku balaréa.

“Taun katukang kungsi digelar di Kacamatan Bojongasih, Bantarkalong, Karangnunggal. Insaalloh dina poé Ahad , Papayung Agung Kab. Tasikmalaya Adé Sugianto badé sumping dina acara punceur,” pokna. (Agung Ilham Setiadi)