Nalungtik Kalong Situ Léngkong

oleh -166 views

MÉRÉBÉJA.COM–Urang Cina kaserang virus corona. Nerekab ka Australia. Urang Sunda gé milu hariwang. Sok sieun katépaan.

Jurutungtik neundeun curiga. Boa virus corona téh jolna tina kalong. Sabab numutkeun panalungtikan, virus corona deukeut-deukeut kana virus nu biasa nyerang ka kalong. Kira 99.98% sarua.

Di Sunda réa kénéh kalong mah. Di antarana di Situ Léngkong, Panjalu. Singgayabag. Singgulantung dina tutuwuhan. Matak narik perhatian sawatara wisatawan.

Lantaran di Panjalu réa kénéh kalong, urang Panjalu kungsi hariwang. Bisi kalong di Situ Panjalu ngaliarkeun virus corona.

Untungna dokter di urang teu cicingeun. Buru-buru nalungtik kalong Situ Léngkong. Nu nalungtikna para ahli ti Fakultas Kedokteran Héwan Istitut Pertanian Bogor (IPB). Sakumaha ditepikeun ku Siti Maémunah, Pupuhu Perhimpunan Dokter Héwan Indonésia (PDHI) Cabang Jawa Barat IV.

“Tos dikomunikasikeun sareng ahli patologi Fakultas Kedokteran Héwan IPB, Prof. drh. Agus Setiyono. Numutkeun hasil panalungtikan, kalong Situ Léngkong teu kaserang virus corona,” ceuk Siti.