Nagri Luhureun Méga Tasikmalaya

oleh -249 views

MÉRÉBÉJA–Keur usum ngaralanto ka nagri luhureun beungeut méga. Di Ciamis upamana, aya Puncak Bangku Negeri di Atas Awan.

Di Tasikmalaya gé aya, atuh! Ngaranna Bukit Puji Ningrum. Ieu mah mangrupa cadas nu ngagantung. Perenahna di Kampung Pasirhaleuang, Désa Janggala, Kacamatan Sukaraja.

“Pokonamah éndah pisan, lah. Tapi kedah wanci meleték panonpoé, ka dieuna. Rarasaan téh keur kumalayang wé di awang-awang. Bisa kémping deuih,” ceuk Jang, urang Pasirhaleuang, Kemis (27/2/2020).

Dina wanci meleték panonpoé mah méga téh blég nu umpal-umpalan. Singgareblég, singgarunduk.

Mun rék nyorang ka Bukit Puji Ningrum, ti puseur Kota Tasikmalaya téh ka arah Sukaraja. Ti alun-alun Sukaraja méngkol ngatuhu, ka arah SD Cibogo. Jarakna kira sakiloan méter.

“Ti SD Cobogo méngkol ka katuhu. Kinten 15 menit gé dugi. Nanging, ka punclutna mah wayahna kedah mapah. Kaéndahan méga gé gumantung kana cuaca,” Jang ngémbohan kateranganna.

Éta gé meunang tumpak motor atawa sapédah kétang, ka punclutna téh. Ngan husus pikeun nu geus tuman. Siga bikers. Nu geus lihéy ngambah wilayah nu tarahal.

“Nami Bukit Puji Ningrum téh nyandak tina nami nu ngagarap kebon. Da kawitna mah ieu téh kebon. Nu miarana aya tiluan, nyaéta Ma Uji, Bi Ening, sareng Bi Irum,” ceuk Yudi Mulyana, salah saurang nu muka Bukit Puji Ningrum.