Judi Balap Lumpat Dibuburak

oleh -587 views

MÉRÉBÉJA – Polisi katut warga wanci tengah peuting, Senen, (14/9/2020) ngabuburak riungan barudak ngora anu ngaradon balap lumpat bari tarumpangan di jalur dua anu rék asup ka Pasar Induk Cikurubuk wewengkon RW 013 Sukajaya Kelurahan Linggajaya Kota Tasikmalaya.

Kusabab warga ngarasa hariwang ku lobana barudak anu ruang-riung, antukna laporan ka Polsek Mangkubumi. Teu pati lila mobil patroli ti Polsek datang ka lokasi. Ningali polisi datang atuh buriak balubar, malahan aya nu tinggaleun motor jeung sendal bakat ku reuwas aya patroli.

Kawas virus Corona nu gampang sumebar, judi balap lumpat anu keur usum (viral) di kota gede kiwari geus aya di Kota Tasik. Olah raga anu sakuduna nyéhatkeun jeung bisa ngaronjatkeun prestasi, malah jadi ajang keur judi.

Dua urang anu dibalapkeun nu lainna jadi bobotoh bari tumpangan, tumpanganna ti mimiti 200 rebu nepi ka sajuta leuwih.

Numutkeun warga ruang-riung kitu téh geus aya ti opat poé ka tukang, awalna mah disangka riungan gang motor anu keur nalongkrong, geuning dijadikeun tempat judi.

Mimiti karumpulna biasa ti jam 23 30 nepi ka jam 02.00 kurang lewih aya saratus urangan. “Ngawitan aya ruang riung di jalur dua ti malem jumat, dibandungan mah gening jarudi balap lumpat. Malahan mah jalan oge ditutup”, kitu pangakuan ti warga.

Warga ngarasa hariwang jeung karasa kaganggu, sok komo deui kanu bade ka Pasar jadi inggis mun ngaliwat ka jalan eta. Pihak Poksek jeung pangurus nu aya di lingkungan siap saraged ngawas eta tempat sangkan teu dijadikeun puseur judi balap lumpat.