Ramatloka Warta Sunda
Literasi Digital, Budaya dan Kewargaan

Gunung Lawu Kahuru

MÉRÉBÉJA – Sawatara poé katompérnakeun silalatu tingjalaul ti Gunung Lawu nu kahuru. Lega ogé leuweungna nu jadi lebu téh. Numutkeun Djohan Surjoputra ti Administratur Kesatuan Pemangkuan Hutan Lawu dan Sekitarnya (KPH Lawu Ds) mah aya kana 30-na hektare.

“Nembé perkiraan. Tacan dugi ka ditél ngukurna mah. Margi nuju pokus kénéh mareuman seuneu. Ké pami tos pareum baris diukur deui nganggé alat nu samistina,” Djohan ngécéskeun.

Tepi ka kiwari geus lima kavling leuweung larangan nu kahuru di Gunung Lawu. Nyaéta kavling 39, 30, 19, 17, jeung 15 BKPH Lawu Kalér nu ngindung ka wilayah Kabupatén Ngawi, Jawa Timur. Ratusan jalma geus dikeprak geusan mareuman seuneu, ti mimiti patugas Perhutani, TNI, Polri, masarakat tug nepi ka rélawan. Kungsi ngalibatkeun anggota satuan tugas pemadam kebakaran deuih.

“Numutkeun wartos nu katampi mah kavling 30, 39, sareng 19 tos hasil dipareuman. Namung, ku margi hawana panas sareng ageungna kelebug angin, seuneu gampil pisan ngaliar ka kavling 15 sareng 17. Ku kituna patugas tetep dipiwarang tetep iyatna,” pok Djohan deui.