Ramatloka Warta Sunda
Literasi Digital, Budaya dan Kewargaan

Batan Lésot Jilbab Mending Bolay

Miftahul Jannah katémbong geus saged. Pon kitu deui lawanna, atlét judo ti Jepang. Ngan hanjakal didiskualifikasi. Alatan narah dibuka jilbab basa rék makalangan di Jlexpo, Kemayoran, Jakarta, Senén (8/10/2018).

Ieu atlét tunanétra asal Acéh Barat téh gilig ninggalkeun lapang. Tibatan lésot jilbab, mending bolay tanding. Padahal préstasina kawilang punjul, najan teu ningali ti umur tilu taun.

Kangsa adu jago di Asian Para Games, ditinggalkeun. Pengkuh nyekel papagon nu ngancik dina dirina.

Wakil Bupati Acéh Barat Daya, Muslizar, ngarojong pisan sikep Miftahul Jannah, nu nampik paménta panata calagara sangkan muka jilbab. Cenah, teu luyu jeung aturan.

“Sikep Miftahul Jannah geus bener. Pikareueuseun. Leuwih-leuwih ti meunang rébuan medali emas,” pokna.