Ramatloka Warta Sunda
Literasi Digital, Budaya dan Kewargaan

Babak Anyar Wacana Jabatan Wakil Bupati Tasikmalaya

SINGAPARNA, MÉRÉBÉJA—Geus méh dalapan bulan Bupati Tasikmalaya, H. Asép Sugianto, S.Ip, teu boga wakil. Cindekna pisan mah ti mimiti diistrénan minangka bupati keur sésa masa jabatan taun 2016-2021, nyaéta tanggal 3 Désémber 2018.

Réa pisan pamaredih supaya Bupati Adé buru-buru boga wakil. Salian ti pihak législatif, apan surat intruksi gé geus sababaraha kali datang. Mimiti Surat Menteri Dalam Negeri Nomor 132/561/OTDA, tanggal 24 Januari 2019. Disusul ku Surat Gubernur Jawa Barat Nomor 132/383/Pemksm, tanggal 1 Februari.

Malah Pamaréntah Provinsi Jawa Barat mah tepi ka dua kali ngirim suratna téh. Nu panganyarna ditanda tanggal 17 Juni 2019, Nomor 132/2572/Pemksm, kalayan sipat surat “Segera”.

Geus karuhan ti pihak législatif. Sabab, apan législatifna gé téréh ganti jelema. Kari dua bulan deui, tepi ka Séptémber 2019. Anggota DPRD période 2014-2019 rék ganti ku anggota DPRD période 2019-2024.

“Nu janten pameredih mah bupati saénggalna ngusulkeun dua calon wakil bupati kanggé piliheun déwan. Harepan mah sateuacan pelantikan anggota déwan nu kapilih dina Pileg 2019 téh wakil bupati tos diistrénan. Hartosna, Agustus tos kedah réngsé,” ceuk Ucu Mulyadi, Anggota Komisi III DPRD Kabupatén Tasikmalaya ti Fraksi PAN.

Tangtuna gé Ucu boga alesan. Cenah, lantaran anggota DPRD période 2014-2019 bakal leuwih weruh kana pasualan nu keur lumangsung. Utamana mah deuih, anggota DPRD nu keur mancén gawé leuwih paham kana karakter para calon wakil bupati.

Ari ceuk éksékutif, nyatana Bupati Adé, pihakna gé cenah lain cicingeun. Adé Sugianto téh di sagédéngeun bupati, nyepeng ngalungguhan Ketua Déwan Pengurus Cabang (DPC) Partai Démokrasi Indonésia (PDI) Perjuangan Kabupatén Tasikmalaya deuih. Ku kituna apal pisan mun sawatara prosés geusan milih piwakileun bupati téh geus dilakonan.

Di antarana, sabada narima usulan calon wakil bupati ti partéy koalisi, tegesna Partai Amanat Nasional (PAN) jeung Partai Keadilan Sejahtera (PKS); terus baé ngiangkeun usulan ka Déwan Pengurus Daérah (DPD) PDI Perjuangan Jawa Barat.

“Intina mah tos aya kamajengan. DPD PDI Perjuangan baris ngulem para calon dinten Salasa ping 23 Juli. Éta gé tos diuningakeun ka masing-masing partéy nu ngajengkeun usulan,” aku Adé.

Saterusna, ceuk Adé kénéh, DPD PDI baris neruskeun usulan ka Déwan Pengurus Pusat (DPP) PDI Perjuangan. Ceuk kitu-ceuk kieu, kaputusan DPP PDI Perjuangan baris diajukeun ku bupati ka DPRD Kabupatén Tasikmalaya.

“Nya, ayeuna mah nuju ngantos hasilna. Mudah-mudahan aya dina kalancaran. Ari DPC sareng DPD PDI Perjuangan mah tos sapuk, kantun rékoméndasi resmi ti DPP baé. Wartosna mah cenah nuju diurus kénéh ku pangurus DPP PDI Perjuangan,” Adé nandeskeun.