Ramatloka Warta Sunda
Literasi Digital, Budaya dan Kewargaan

APBD Kudu Mihak ka Rahayat

SINGAPARNA, MÉRÉBÉJA—Kari sabulan deui Déwan Perwakilan Rahayat Daérah (DPRD) Kabupatén Tasikmalaya période 2014-2019 mérén gawé. Bates ahirna tanggal 2 Séptémber 2019. Terus baé diganti ku anggota DPRD période 2019-2024. Dumasar kana kaputusan Komisi Pemilihan Umum (KPU) Kabupatén Tasikmalaya, anggota DPRD téh 29 urang nu heubeul, sésana 21 urang nu anyar.

Salah saurang nu moal ngantor deui di DPRD Kabupatén Tasikmalaya téh Dr. H. Basuki Rahmat, M.Si. Salah sahiji politisi ti Partéy Persatuan Pembangunan (PPP). Di DPRD nyepeng kalungguhan Wakil Ketua Komisi I jeung anggota Badan Anggaran (Banggar).

Lima taun katompérnakeun Basuki jadi anggota Banggar. Weruh pisan sual Anggaran Pendapatan dan Belanja Daerah (APBD) mah. Cenah, ésénsi tina APBD téh amanah ti rahayat. Atuh pamaréntah gé gudu matéakeun APBD keur karaharjaan rahayat. APBD téh lir ibarat urat nadi. Gunana kacida penting jang pangwangunan daérah, blég urat nadi jang kahirupan manusia.

“APBD kedah leres-leres mihak ka rahayat, nohonan kahoyong rahayat, demi karaharjaan rahayat. Nu mawi, pangwangunan daérah kedah gaduh tujuan kanggé ngaraharjakeun rahayat,” ceuk Basuki.

Dina prakna, ceuk Basuki kénéh, matéakeun APBD téh unggal taun gé kudu bari ngalegaan lapangan kerja, merangan kamiskinan, méré solusi jang nu nganggur, jeung ngaronjatkeun paékonomian. Najan kitu, Basuki gé teu ngabibisani mun kitu gawé téh teu babari.

Sangkan bisa disorang kalayan hampang, taya deui tarékahna iwal ti kudu sauyunan antara sakumna pihak di jajaran pamaréntahan Kabupatén Tasikmalaya. Paling henteu kudu aya gawé rancagé antara éksékutif jeung Tim Anggaran Pemerintah Daérah (TAPD) katut Satuan Kerja Perangkat Daérah (SKPD).