Ramatloka Warta Sunda
Literasi Digital, Budaya dan Kewargaan

Anggota Déwan Karedal Jangji

SINGAPARNA, MÉRÉBÉJA—Poé Senén (2/9/2019). Rebub kénéh komplék pakantoran Bupati Tasikmalaya geus hirup. Bur-ber mobil jeung motor. Polisi Pamong Praja (Pol PP) ngajarega dina lawang komplék. Ruas jalan nu bisa lempeng gé ngadadak dipéngkolkeun ka lebah gedong Dewan Perwakilan Rakyat Daerah (DPRD).

Di sabudeureun gedong déwan geus réa ratusan pulisi. Aya ti BPBD deuih. “20 urangan,” ceuk salah saurang ti maranéhna. Atuh nu juprat-jeprét popotoan, sélpi, di tempat parkir gé paying laliud. Poé harita mah sasat sakabéh pangeusi gedong déwan nu sakitu legana téh tamplok ka rohang Rapat Paripurna.

Enya, apan poé harita téh rék aya nu kedal jangji. Kabéhna 50 urang calon anggota DPRD Kabupatén Tasikmalaya keur lima taun ka hareup (2019-2024). Nyaéta nu ngaraéh sora pangréana dina Pileg 2019. Tina anu 50 urang téh, 29 urang mah nu saméméhna gé geus jeneng di dinya. Sésana wéh nu anyar.

Acara dibuka jam 10.25 WIB. Geus méh nyedek ka Lohor karedal jangjina mah. Ditungtun ku H. Winarno, SH, MH, Ketua Pengadilan Negeri Tasikmalaya. Terus baé sumpahna “dibeungkeut” ku Drs. Yayat Kardiat ti Kantor Kementerian Agama Kabupatén Tasikmalaya.

Nu nyaksian sumpahna anggota déwan kira-kira 1.500-an urang. Di antarana kulawarga nu karedal sumpah, Kapolés Kabupatén Tasikmalaya, Kapolrés Kota Tasikmalaya, Bupati Tasikmalaya, Sékretaris DPRD katut réngrénganana, para Kapala SKPD, jeung lianna nu ngahaja diondang.

Bareng jeung éta, nu 50 urang téh sah jadi anggota déwan. Nu mayunganana Surat Kaputusan Gubernur Jawa Barat Nomor 171.2/Kep.695-Pemksm/2019 Tentang Peresmian Pengangkatan Keanggotaan Dewan Perwakilan Rakyat Daerah Kabupaten Tasikmalaya masa jabatan taun 2019-2024.

Éta surat ditanda ku M. Ridwan Kamil di Bandung, tanggal 28 Agustus 2019. Nu macakeunna Sékretaris DPRD Kabupatén Tasikmalaya, Iing Faridz Khojin.