Ramatloka Warta Sunda
Literasi Digital, Budaya dan Kewargaan

#2019GantiPresiden jeung #Jokowi2Periode Lain Kompanyeu

MÉRÉBÉJA – Komisioner Komisi Pemilihan Umum (KPU), Wahyu Setiawan, nétélakeun déklarasi boh #2019GantiPresiden boh #Jokowi2Periode lain kompanyeu. Duanana sarua aspirasi masarakat.

“Teu bisa nyoko kana hiji tagar.
#2019GantiPresiden atawa #Jokowi2Periode teu kaasup kana metode pikeun kompanyeu” cék Wahyu ka wartawan di Kantor KPU, Menteng, Jakarta Pusat, Senén (27/8/2018).

Wahyu ngaku yen perang tagar jeung deklarasi #2019GantiPresiden atawa #Jokowi2Periode teu kawengku dina peraturan KPU (PKPU). Tapi, Wahyu negeskeun lain hartina nu kawas kitu téh diwenangkeun bari teu maliré aturan séjén.

“Lantaran aya hukum séjén nu ngatur éta perkara. Unggal pihak kudu tukuh kana hukum nu aya. Kaasup panaratas déklarasi-déklarasi, boh #2019GantiPresiden boh #Jokowi2Periode. Kabéh kudu tuhu kana hukum,” pokna saperti nu diémbarakeun republika.co.id.

Pon kitu deui kamandang anggota Bawaslu, Fritz Edward Siregar, teu béda jeung Wahyu. Dua tagar nu keur patojoiah teu kaasup kana kompanyeu. Apan ayeuna mah kakara aya pasangan bakal capres-cawapres. Can dikukuhkeun resmi ku KPU.

“Dumasar kana UU Nomor 7 Tahun 2017 harti kompanyeu téh kagiatan nu dilakukeun ku peserta pemilu nu nembrakkeun visi jeung misina. Naha ayeuna geus aya capres-cawapresna? Bawaslu can wenang pikeun nindak,” pokna nandeskeun.

Mairan